وجه الإعلامي أحمد موسى الشكر للشعب المصري على اهتمامهم بالسؤال عنه في أثناء رحلة علاجه قائلا: بشكر كل واحد سأل واطمن عليا.. ممتن جدا لحضراتكم.. سؤالكم بيخليني أتحمل المسؤولية مع حضراتكم.. 43 سنة شغال في مجال الإعلام و12 سنة في قناة صدى البلد.. سنوات من الجهد وساعات عمل طويلة.. مشقة لا تتحمل.. من بعد العيد الصغير عانيت من ظرف صحي لا يعلمه إلا أولادي وبيتي.
وأضاف خلال برنامج على مسئوليتي المذاع على قناة صدى البلد: كنت شغال في ظروف معينة وكنت بتحمل وآخد مسكنات ورحت لكل الأطباء في مصر.. وبوجه الشكر للسيد وزير الصحة ومنظومتنا الصحية الممتازة.
وتابع أحمد موسى: لما رحت ألمانيا أول حاجة اتكلم معايا فيها الدكتور هو الطب في مصر وامتياز الاطباء المصريين.. الحمد لله بشكر ربنا على نعمه وفضله.. وعاوز أقول لحضراتكم من تجربتي.. الرياضة ثم الرياضة.. لازم تعمل رياضة.. أي 5 دقايق عندي بعمل فيهم رياضة.. وأنا قاعد ولا واقف حتى.. اتمشوا المشي والحركة مهمين جدا.
وواصل أحمد موسى: الدكتور سألني بتعرف تعوم قلت له آه.. قال لي عوم.. أو اجري أو امشي.. القاعدة بتاعتنا دي صعبة جدا.
واختتم قائلا: أول ما وصلت قابلني شاب مصري اسمه مينا من الزقازيق.. راجل جاله شغل في ألمانيا قال لي مصر وحشتني.. هي دي مصر.. أنا قعدت أسبوع وحسيت أني عاوز أرجع جري.
